Kismayo -17-05-06 (Alljubbaland.com) Waxaa shalay makhribkii soo caga dhigatey Garoonka diyaaradaha ee magaalada Laascaanood wafti heer sare ah oo isugu jiray
ugaasyo,iimaamo,aqoonyahano iyo odayaal soomaaliyeed oo ka kala yimid meelo badan oo ka mid ah koonfurta Soomaaliya.

Waftigan oo qayb ka mid ahi ka timid dhinaca dekeda ah ee Kismaayo ayaa waxa hogaaminayey Ugaaska Beesha Sadde(Mareexaan) UGAAS CIISE UGAAS FAARAX,iyo UGAASKA BEESHA HARTI WAAMO(KISMAAYO) UGAAS MAXAMUUD BAQOOW,waxaa qaybta kale oo iyaguna reer Muqdisho ah hogaaminayey Ugaaska Maxamuud Hiraabe(Duduble) ugaas Muxiyadiin Ugaas Faarax Foodey iyo Wakiilka imaanka beesha Hiraab Iimaan Maxamuud Iimaan Cumar oo lagu magacaabo Maxamed Afrax Suxuley iyo odayaal iyo waxgarad badan oo ka yimid gobolada koonfurta Soomaaliya.Waftigaas waxaa ku soo dhoweeyey garoonka Dr Faarax Ciise Cabdi oo ah madaxa gudiga soo dhoweynta waftiyada kala duwan,waxaana martida la dejiyey Hotel Nugaal oo ah hotel loo sii diyaariyey.
Nasasho yar kadib waxay wufuudu booqasho ugu tageen guriga Garaad Jaamac Garaad Cali,waxaana halkaas ka dhacay isbrasho,salaan iyo kaftan,kadibna waxaa mikrifoonka qaatay Dr Galaydh oo ugu horeyn isagoo ku hadlaya magaca reer Laascaanood ku soo dhoweeyey waftigaas madasha Calemosaarka,wuxuuna uga mahadnaqay sida wanaagsan ee soomaalinimada iyo muslinimada ah ee ay ugala soo qayb galeen xaflada caleemo saarka Garaadka beesha Dhulbahante,wuxuuna xasuusiyey in "Minanku minankiinii waaye " ,isla markaana ay yimaadeen dhulkoodii,qofna aanay marti uga ahayn,waxaa iyaguna halkaas hadalo soo dhoweyn iyo salaan ah ka soo jeediyey Wasiirka Arimaha Gudaha &Amniga Axmed Cabdi Xaabsade,Suldaan Saciid Cismaan Cali,Xaaji Max’uud Xaaji Cumar Camey.

Dhinaca kale waxaa waftigii reer Muqdisho u hadlay Wakiilka Iimaam Max’uud Iimaam Cumar oola yidhaahdo Maxamed Afrax Suxuley,isagoo sheegay sida ay ugu faraxsan yihiin inay yimaadaan Laascaanood,isla markaana ay nasiib u yeeshaan in ay kala qayb qaataan walaalahooda caleemo saarka Garaad Jaamac Garaad Cali ,waxaanu halkaas ka sheegay inuuka sido fariin Iimaanka beesha HIRAAB,HAWIYE,uuna u sido dhamaan Bulshada SSC,khaas ahaan Garaadka cusub , wuxuu kaloo sheegay in iimaanku uu jeclaa inuu yimaado caleemo saarka,balse sida la wada og yahay ay ka jiraan magaalada ay ka yimaadeen ee Muqdisho colaado dheeraaday,kuwaas oo uu iimaanku ku hawlan yahay qaboojintooda.
Mr Suxuley ayaa isaga oo hadalkiisa sii wata waxa uu si kaftan ah u yidhi " Waxaan kula kaftey raga qaarkiis,waar hadii ay jirtey magaalo Soomaaliyeed oo quruxdan iyo bilicdan leh,islamarkaana sidan u nabad badan XAAD
Waxaa isna halkaas hadalo qiimo badan ka soo jeediyey ugaaska Sadde,Daarood, Ugaas Ciise Ugaas Faraax,wuxuuna sheegay in uu salaan ka sido beeshii uu ka yimid,isla markaana uu ku faraxsan yahay in uu yimid Laascaanood,waxaa isan hadal kaas u dhow yidhi Ugaaska Hartiga Koonfureed Ugaas Baqoow,waxaana kulankaas oo casho iyo nasasho ay xigtay uu ku dhamaaday,jawi wanaagsan,kuwaas oo dhamaantood sheegay inay u tahay sharaf weyn inay yimaadaan kana qayb qaataant caleemo saarka Garaadka 19-AAD ee beesha Dhulbahante GARAAD JAAMAC GARAAD CALI,oo dhacaysa isniinta soo socota hadii ilaahay idmo.

Cabdi Wali Garyare
Alljubbaland.com Nairobi Kenya
garyare20@hotmail.com